இலங்கைக்கு சுற்றுலா வாகன இறக்குமதி: அமைச்சரவை அனுமதி

சுற்றுலா வாகனங்களை இறக்குமதி செய்வதற்கான விதிமுறைகளை நாடாளுமன்றத்தில் சமர்ப்பிப்பதற்கு அமைச்சரவை அங்கீகாரம் கிடைத்துள்ளதாக தெரிவிக்கப்படுகின்றது.

2023 ஆம் ஆண்டின் இறக்குமதி மற்றும் ஏற்றுமதி கட்டுப்பாட்டு ஒழுங்குமுறை இலக்கம் 2 இன் படி, இலங்கைக்கான மோட்டார் வாகனங்களின் இறக்குமதி தற்காலிகமாக இடைநிறுத்தப்பட்டிருந்தது.

இருப்பினும், சுற்றுலா மற்றும் காணி அமைச்சரின் முன்மொழிவின் படி போக்குவரத்துக்காக 250 மினி பேருந்துகள் மற்றும் 75 வான்களுக்கு கடந்த முதலாம் திகதி நடைபெற்ற அமைச்சரவைக் கூட்டத்தில் ஒப்புதல் அளிக்கப்பட்டிருந்தது.

இதனடிப்படையில், மேற்படி தீர்மானத்தை நடைமுறைப்படுத்துவதற்காக இறக்குமதி மற்றும் ஏற்றுமதி கட்டுப்பாட்டு விதிமுறைகள் வெளியிடப்பட்டுள்ளன.

மேலும், விசேட வர்த்தமானி அறிவிப்பின் ஊடாக வெளியிடப்பட்டுள்ள ஒழுங்குமுறை சட்டத்தை நாடாளுமன்றத்தின் ஒப்புதலுக்காக சமர்ப்பிப்பதற்கு பொருளாதார ஸ்திரப்படுத்தல் மற்றும் தேசிய கொள்கை அமைச்சர் என்ற வகையில் அதிபர் சமர்ப்பித்த பிரேரணைக்கு அங்கீகாரம் வழங்கியுள்ளமை குறிப்பிடத்தக்கது.