காசாவில் ஜனவரி 17, 2025 அன்று போர் நிறுத்த ஒப்பந்தம் ஏற்பட்ட இரண்டு மாதங்களுக்குப் பிறகு, மார்ச் 18, 2025 அன்று இஸ்ரேல் இராணுவ நடவடிக்கைகளை மீண்டும் தொடங்கியதைத் தொடர்ந்து, காசா பகுதியில் ஹமாஸ் அமைப்பின் பல அரசாங்கத் தலைவர்கள் கொல்லப்பட்டதாக ஹமாஸ் அமைப்பு அறிவித்துள்ளது.
கொல்லப்பட்ட அதிகாரிகள் அரசாங்க பின்தொடர்தல் குழுவின் தலைவர் இசாம் அல்-தாலிஸ்; காசாவில் நீதித்துறை துணை அமைச்சர் அகமது அல்-ஹட்டா, உள்துறை துணை அமைச்சர் மேஜர் ஜெனரல் மஹ்மூத் அபு வஃப்தே; மற்றும் உள்நாட்டு பாதுகாப்பு சேவை பணிப்பாளர்மேஜர் ஜெனரல் பஹ்ஜத் அபு சுல்தான் ஆகியோராவார்.
கொல்லப்பட்ட பஹ்ஜத் அபு சுல்தான்(Bahjat Abu Sultan) ஹமாஸின் உள்நாட்டுப் பாதுகாப்பு சேவைகளின் பணிப்பாளர் ஜெனரலாக இருந்தவர்.காசாவின் உள்துறை அமைச்சகத்தில் பல்வேறு பதவிகளை வகித்தார்.
மற்றொருவரான இசாம் அல்-தாலிஸ்(Issam Al-Dalis) முன்னாள் ஹமாஸ் தலைவர் இஸ்மாயில் ஹனியேவின் அரசியல் ஆலோசகராகவும், ஹமாஸின் நிர்வாக அலுவலகத்தில் உறுப்பினராகவும் பணியாற்றினார். அந்த அமைப்பின் நிதி மற்றும் பொருளாதாரத் துறைக்கு தலைமை தாங்கினார் மற்றும் ஹமாஸின் அரசியல் பணியகத்தின் துணைத் தலைவராகவும் பணியாற்றினார்.
ஹமாஸின் மிக முக்கியமான நபர்களில் ஒருவரான மஹ்மூத் அபு வஃப்தா(Mahmoud Abu Wafta), அமைப்பின் பாதுகாப்பு மற்றும் அரசியல் முடிவுகளில் முக்கிய பங்கு வகித்தார். அவர் காசாவில் உள்துறை துணை அமைச்சராக பணியாற்றினார்.
“அபு உமர்” என்று அழைக்கப்படும் அகமது உமர் அல்-ஹட்டா(Ahmed al-Hatta), சட்டத்தில் முதுகலைப் பட்டம் பெற்று, காசாவில் உள்ள ரபாத் காவல் கல்லூரியின் பீடாதிபதியாக பணியாற்றினார். டிசம்பர் 2021 இல், நீதிபதி முகமது அல்-நஹலுக்குப் பிறகு, காசாவில் நீதித்துறை துணை அமைச்சராக நியமிக்கப்பட்டார்.
மார்ச் 2025 இல் காசா மீது இஸ்ரேலிய வான்வழித் தாக்குதல்கள் காரணமாக பல அரசாங்கத் தலைவர்களுடன் சேர்ந்து அல்-ஹட்டாவின் மரணத்தை ஹமாஸ் அறிவித்தது. அல்-ஹட்டா தனது மனைவி பாத்திமா மற்றும் குழந்தைகள் யஸ்ரா, உமர், ஹுடா, ஹாகர், ஜனான் மற்றும் பனான் ஆகியோருடன் இறந்ததாக தெரிவிக்கப்பட்டது.
